يوم 13 مارس 2012 ماكانش يوم عادي بالنسبة لشباب الانترنات.. الشباب اللي عانى سنين وسنين من عمار 404 و من الدوريات اللي "تهبط" في الليل باش تفركس البيروات... يوم 13 مارس كان يوم زهير اليحياوي.. زهير اللي عذبوه حتى للموت.. زهير اليحياوي اللي حب يقول لبن علي في 2005 "يزي-فك".. البارح في فصر قرطاج اللي كان في الماضي هو غرفة العمليات جاو الناس الكل اللي حاربوا بن علي بدرجات متفاوتة باش يقول "شكرا زهير اليحياوي" وباش يقولوا زاده "احنا على العهد.. ماناش باش نستسلموا.. وشمعة الحرية باش تبقى تضوي علينا". في قصر قرطاج اللي كانت تخرج منوا الأموامر بالتعذيب والقتل و خنق الحريات وقطع الارزاق.. كان الشباب حاضر باش ياقف في وضع المنتصر ويقول "في الآخر.. أحنا اللي بقينا.. وبن علي والزبانية متاعو إلى الجحيم" ... البارح كان القرار باش يكون يوم 13 مارس من كل عام ذكرى لزهير اليحياوي و عيد لحرية الانترنات والمدونين..
واحنا هنا مانجموش نمروا على الحدث من غير ما نحيوا خونا "حسام حجلاوي" . اللي كان حاضر البارح في تكريم المرحوم اليحياوي.. وان شاء الله الحرية هذي تذوم علينا.. ونجموا نستغلوها باش نبنوا بلادنا كيف ما نحبوها.. بلاد تضم الجميع "البطال.. واللي يحب برشة حريات ..." (كيف ماقال المرحوم زعبع) ;)
حســــام هاني
0 commentaires:
Enregistrer un commentaire